Igbo Mass Readings for March 24 2025, Mọnde Izuụka nke Atọ n'Oge Lent

Igbo Mass Readings for March 24 2025, Mọnde Izuụka nke Atọ n’Oge Ncheta Ahụhụ Kristi

Nke a bụ Igbo Mass Readings maka March 24 2025, Mọnde Izuụka nke Atọ n’Oge Ncheta Ahụhụ Kristi.

IHE ỌGỤGỤ NKE MBỤ – 5:1-15

Ihe Ọgụgụ e wetara n’Akwụkwọ nke abụọ nke Ndịeze

Naaman onye isi agha nke Siria bụ nwoke dị ukwu n’ihu nna ya ukwu, n’ihina site na mgbalị ya ka Yahweh ji nye Siria mmeri. Nwoke a bụ dike n’agha, ma ọ bụ onye ekpenta.

N’otu n’ime agha ha busoro Izrel na mberede, ndị Siria dọtara otu ntakịrị nwaagbọghọ, onye nke mechara bụrụ odibo nwunye Naaman. Nwata a gwara nne ya ukwu sị, “A sị na nna m ukwu ga-agakwuru onye amụma nke bi na Sameria!

Ọ ga-agwọ ya ọrịa ya.” Naaman jekwuru nna ya ukwu kọsara ya kpọmkwem, ihe niile nwatakịrị ahụ kwuru. Eze Siria zara ya sị, “Gaba ugbu a, aga m enye gị akwụkwọozi ị ga-enye eze Izrel.”

Ọ gabara, were talent ọlaọcha iri, puku shekel ọlaedo isii na uwe emume iri. O wetaara eze Izrel akwụkwọozi ahụ nke ihe e dere n’ime ya bụ, “Akwụkwọozi a bụ iji gwa gị na ezitere m nwodibo m bụ Naaman ka ị gwọọ ya ọrịa ekpenta ya.

Mgbe eze ndị Izrel gụrụ akwụkwọozi ahụ ọ dọwaa uwe ya kwuo sị, “Abụ m Chineke onye ọnwụ na ndụ dị n’aka mere nwoke a jiri zitere m ozi ka m gwọọ onye ekpenta?

Hụkwanụ otu Nwoke a si achọ m okwu!” Mgbe Elaịsha onye nke Chineke nụrụ ka eze ndị Izrel siri dọwaa uwe ya, o zigaara ya ozi jụọ ya sị, “Kedụ ihe kpatara I jiri dọwaa uwe gị?

Gwa nwoke ahụ ka ọ bịakwute m, ọ ga-amata na enwere onye amụma n’ala Izrel.” Ya mere, Naaman jiri ịnyịnya ya na ụgbọịnyịnya ya bịa guzoro n’ọnụụzọ ụlọ Elaịsha.

Elaịsha zipụrụ onyeozi ka ọ gwa ya sị, “Gaa saa ahụ n’osimiri Jọdan ugboro asaa, ahụ gị ga-adịkwa mma ọzọ.” Naaman jiri iwe na ọnụma tụgharịa laba, na-ekwu sị, “Echere m nnọọ na ọ gaara apụta, guzoro, kpọkuo aha Yahweh Chineke ya, fegharịa aka ya n’elu ebe ahụ, gwọọ ọrịa m.

Ọ bụ na osimiri Abana na Fapa nke dị na Damaskọs adịghị mma karịa mmiri Izrel niile? Ọ bụ na enweghị m ike ịsa ahụ n’ime ha wee dị ọcha?” Ya mere, ọ tụgharịa laba n’iwe.

Ndị odibo ya bịakwutere ya sị ya, Nna anyị ukwu, a sị na ihe onye amụma gwara gị mee bụ ihe siri ike omume, ọ bụ na ị gaghị eme ya? Ma nke a bụna ọ gwara gị naanị saa ahụ ka ị dịkwa ọcha.

Ya mere ọ gara sụnye onwe ya n’ime osimiri Jọdan ugboro asaa dịka Elaịsha gwara ya. Anụahụ ya wee dịkwa mma dị ka ahụ nwatakịrị. Mgbe ahụ, Naaman na ndị ozi ya laghachiri jekwuru onye nke Chineke ahụ sị ya, Ugbu a, amatala m na enweghị chi ọzọ n’elu ụwa belụsọ n’ala Izrel. Biko nara ihe onyinye ekele sitere n’aka nwodibo gị.’