Igbo Mass Readings for February 3 2026, Tuzde n’ime Izuụka nke Anọ N’Oge Adanyeghị n’Emume.

Nke a bụ Igbo Mass Readings for February 3 2026, Tuzde n’ime Izuụka nke Anọ N’Oge Adanyeghị n’Emume.

IHE ỌGỤGỤ NKE MBỤ – 18:9-10, 14, 24-25, 30-19:3

Ihe Ọgụgụ ewetara n’Akwụkwọ abụọ nke Samuel

Na mberede, Absalọm zutere ụfọdụ n’ime ndịagha Devid. Ọ nọkwa n’elu ịnyịnya ya na-aga. Mgbe ọ na-agafe n’okpuru nnukwu osisi Ook, ntutuisi Absalọm tụhịkwara n’alaka osisi Ook ahụ. Absalọm ekoro n’elu, ịnyịnya ya agbafere.

Otu onye n’ime ndịagha Devid hụrụ ya, kọọrọ Joab sị, “Ahụrụ m Absalọm ka o kooro n’osisi Ook!” Joab gwara ya sị, “Mụ na gị agaghị anọ n’ebe a na-egbu oge.” O weere ube ọnụ atọ mawaa Absalọm obi mgbe ọ ka dị ndụ n’elu osisi Ook ahụ o kooro.

Devid nọ n’etiti ọnụ ụzọ ime na nke mpụta Jerusalem. Onyenche rigooro n’elu aja ọnụụzọ ama obodo ahụ, hụ otu nwoke na agbata ọsọ. Ọ kpọrọ eze gwa ya ihe ọ hụrụ. Eze asị ya, “Ọ bụrụ sọ naanị ya, o ji ozi ọma na-abịa.’

Onyeozi ahụ abịasie ike, rute nso. Eze sịrị ya, “Jee kwụrụ n’akụkụ.” O wee nọzụga, kwụrụ n’ebe ahụ. Onye Kush ahụ bụ odibo bịaruru sị eze Devid, “Ewetaara m onyenwe m eze oziọma!

Taa, Osebụrụwa enyela gị mmeri n’ebe ndị niile biliri imegide gị nọ!” Eze jụrụ ya sị, “Nwaokorobịa ahụ bụ Absalọm, ọ nọ ndụ?” Odibo ahụ zara sị, “Ka ndịiro onyenwe m eze, na ndi niile biliri imegide ya dịka nwaokorobịa ahụ!” O wutere eze nke ukwuu.

Ọ rịgoro n’ụlọ elu nke ọnụụzọ ama, nọrọ ebe ahụ kwaa akwa. Ka ọ na eje, ọ na-akwa akwa sị, “Nwa m Absalọm! Nwa m, nwa m Absalọm! Ọ ga-akara m nọọ mma a sị na m nwụrụ n’ọnọdụ gị. Absalọm, nwa m, nwa m!”

Joab nụrụ na eze Devid na-akwa akwa, na-eru ụjụ maka Absalọm. Ọñụ mmeri wee tụgharịa ghọọrọ ndịagha Devid niile iru ụjụ n’ụbọchị ahụ, maka na ha nụrụ na eze na-eru ụjụ n’ihi nwa ya. Ha jiri nwayọọ banye n’ime obodo dịka ndịagha ji ihere na-agbalaga n’agha.

ABỤỌMA NA AZỊZA – Ps. 86:1-2, 3-4, 5-6

Azịza: Gee m ntị Onyenweanyị, zaa m

1. Gee m ntị Onyenweanyị, zaa m

n’ihina abụ m ogbenye na-enweghị enyemaka

Chekwaba ndụ m, n’ihina enwere m okwukwe na gị

zọpụta nwodibo gị onye tụkwasara obi na gị.

Azịza: Gee m ntị Onyenweanyị, zaa m

2. Ịbụ Chineke m meere m ebere, Onyenweanyi,

Ọ bụ gị ka m na-akpọku kwa ụbọchị niile

Mee ka mkpụrụobi nwodibo gị jupụta n’ọñụ, Onyenweanyị

n’ihina ọ bụ gị ka m na-akpọku n’ekpere m.

Azịza: Gee m ntị Onyenweanyị, zaa m

3. Onyenweanyị, Ị dị ebere dị mgbaghara,

i nwere nnukwu ịhụnaanya n’ebe ndị niile na-akpọku gị nọ.

Onyenweanyị nụrụ ekpere m,

Gee m ntị nụrụ arịrịọ m.

Azịza: Gee m ntị Onyenweanyị, zaa m

MBEKU – Ps. 119:18

Alleluia, Alleluia:

Meghee anya m, ka m wee hụ ihe ịtụnaanya dị n’iwu gị.

Alleluia.

OZIỌMA – 5:21-43

Ihe Ọgụgụ nke a si n’Oziọma dị asọ nke Mak dere.

Mgbe Jesu jiri ụgbọ gafee n’akụkụ nke ọzọ, oke igwe mmadụ zukọrọ n’ebe ọ nọ, ya onwe ya nọ n’akụkụ osimini. Mgbe ahụ, otu n’ime ndịisi ụlọnzukọ ndị Juu, aha ya bụ Jaịrus bịara.

Ozigbo ọ hụrụ Jesu, ọ dara n’ụkwụ ya, rịọsie ya ike sị, “Nwa m nwaanyị nta nọ n’ọnụ ọnwụ; biko bịa bikwasa ya aka, ka ahụ dị ya mma ọzọ, ka ọ dịkwa ndụ”.

Jesu sobere ya, ma oke igwe mmadụ ahụ sogharịbara ma gbakwaa ya gburugburu. E nwere otu nwanyị nke nọ n’ọrịa oruru ọbara afọ iri na abụọ.

Nwanyị a ataala ahụhụ n’aka ọtụtụ dibịa mefuchaa ihe niile o nwere; kama ahụ ga-adị ya mma, ya jọkarịa njọ. Ọ nụla akụkọ banyere Jesu, wee zobe n’igwe mmadụ ahụ, si n’azụ metụ uwe Jesu aka, n’ihina o kwuru n’obi ya sị, “Ọ bụrụ na m metụ ọ bụladị ọnụ uwe ya aka, ahụ ga-adị m mma”.

Ozigbo ahụ oruru ọbara ya kwụsịrị, o metụ ya n’ime ahụ na a gwọọla ya site n’ajọ ọrịa ahụ. Ma mgbe Jesu matara na ike esila ya n’ahụ pụọ, ọ jụrụ sị, “Onye metụrụ uwe m aka?”

Ma ndị na eso ụzọ ya jụghachiri ya sị, “Gịnị mere I ji ajụ ajụjụ dị otu a sị, “Onye metụrụ m aka, ebe ị hụrụ na igwe mmadụ ha otu a na-akpagide gị?” Jesu legharịrị anya ka ọ hụ onye mere ihe ahụ. Ma nwaanyị ahụ ebe ọ matara ihe e mere n’ahụ ya, ọ tụrụ egwu marakwa jijiji bịa daa n’ihu Jesu, gwa ya eziokwu niile.

Ma Jesu sịrị ya, “Ada, okwukwe gị azọọla gị; laa n’udo, si n’ajọ ọrịa gị nwee ahụ ike”. Mgbe ọ ka kpụ okwu a n’ọnụ, ụfọdụ mmadụ siri n’ụlọ Jaịrus onyeisi ụlọnzukọ bịa, zie ya sị, “Nwa gị nwaanyị anwụọla.

Oleekwa ihe I ji enye onyenkuzi a nsogbu?” Mana Jesu egeghị ntị n’ozi ha ziri, kama ọ sịrị onyeisi ụlọnzukọ ahụ, “Atụla egwu, kama kwere”. O kweghị ka onye ọbụla soro ya gaa, beeresọ Pita, Jemis na nwanne ya bụ Jọn.

Mgbe ha bịarutere n’ụlọ onyeisi ụlọnzukọ ahụ, ọ nụrụ ụzụ hụkwa ọtụtụ mmadụ ka ha nọ na-ebe akwa na-etikwa mkpu. Mgbe ọ batara, ọ jụrụ ndị mmadụ sị, “Gịnị mere ụnụ ji eti mkpu na-ebekwa akwa? Nwantakịrị a anwụghị anwụ, kama ọ na-arahụ ụra”.

Ha chịrị ya ọchị. Ọ chụpụrụ ha niile ezi kpọrọ nna nwatakịrị ahụ na nne ya, na ndị na-eso ụzọ ya banye n’ebe nwatakịrị ahụ nọ. O jidere nwatakịrị ahụ n’aka sị, “Talita Kumi, nke pụtara “Nwaagbọghọ nta asị m gị kulie.”

Ozigbo nwaagbọghọ nta ahụ bilitere, gagharịa, n’ihina ọ gbaala afọ iri na abụọ. Ozigbo ahụ, ihe a merenụ bụụrụ ha nnukwu ihe ịtụnnanya. Ma Jesu nyesiri ha iwu ike ka ha ghara ime ka onye ọbụla mara nke a bịa gwakwa ha ka ha nye nwaagbọghọ nta ahụ ihe oriri.

Igbo Mass Readings for February 4 2026, Wenezde n’ime Izuụka nke Anọ N’Oge Adanyeghị n’Emume.

Igbo Mass Readings for February 3 2026, Tuezde n’ime Izuụka nke Anọ N’Oge Adanyeghị n’Emume.