Igbo Mass Readings for October 11 2026, Ụka nke Iri Abụọ na Asatọ n’Oge Na-Adanyeghị N’Emume – Afọ nke Mbụ.
Nke a bụ Igbo Mass Readings for October 11 2026, Ụka nke Iri Abụọ na Asatọ n’Oge Na-Adanyeghị N’Emume – Afọ nke Mbụ.
IHE ỌGỤGỤ NKE MBỤ – 25:6-10
Ihe Ọgụgụ e wetara n’Akwụkwọ onye Amụma Aịzaya
Isi Okwu: Onyenweanyị ga-akpọ nnukwu oriri bịakwa hichaa onye ọ bụla anya mmiri.
Ọ bụ n’ugwu nke a, ka Onyenweanyị nke igwe ndị agha, ga-akpọrọ agbụrụ niile oke oriri, nke jupụtara na nri gbara abụba na mmanya bụ ọkachamma.
N’ugwu nke a, Ọ ga-ebibi ihe nfụchi ahụ fụchiri agbụrụ niile, na ihe mkpuchi ahụ e jiri kpuchi mba niile. Ọ ga-ala ọnwụ n’iyii ruo mgbe ebighị ebi. Onyenweanyị Chineke ga-ehicha anya mmiri n’ihu ha.
Ọ ga-esi n’ụwa niile wepụ nkwulu a na-ekwulu ndị nke Ya. N’ụbọchị ahụ, a ga-asị: “Lee Chineke anyị, Onye anyị na-ele anya na Ọ ga-azọpụta anyị. Ka anyị ñụrịanụ ọnụ bịakwa nwee obi añụrị na Ọ zọpụtala anyị.” N’ihi na aka nke Onyenweanyị ga-anọzi n’elu ugwu a.
ABỤỌMA NA AZỊZA YA – 22 Az. 6
Azịza: Aga m ebi n’ụlọ Onyenweanyị, ụbọchị ndụ m niile.
1. Dinwenụ bụ onye nche m. O nweghị ihe ọ bụla ga-akọ m.
Ebe ahịhịa ndụ juru eju ka Ọ na-enye m ezumike.
Ọ na-eduga m n’agịga mmiri ka m zuru ike,
bịakwa na-agba m ume ka m kute ume ndụ.
Azịza: Aga m ebi n’ụlọ Onyenweanyị, ụbọchị ndụ m niile.
2. Ọ na-eduzi m n’ụzọ ziri ezì n’ihi aha Ya.
Ọ bụrụgodụ na m na-aga na ndagwurugwu nke ọchịchịrị,
egwu ọ bụla agaghị atụ m.
N’ihi na I ji mkpara na ngu Gị nọrọ m n’akụkụ, iji gbaa m ume.
Azịza: Aga m ebi n’ụlọ Onyenweanyị, ụbọchị ndụ m niile.
3. I ji aka Gị kwadoro m oriri nke m ga-eri n’ihu ndị iro m.
I ji aka Gị tee m ude n’isi.
Iko mmanya m ejula n’ọnụ.
Azịza: Aga m ebi n’ụlọ Onyenweanyị, ụbọchị ndụ m niile.
4. Sọ ịdịmma na obi ọma Gị ga na-eso m n’ụbọchị ndụ m niile.
Aga m ebi n’ụlọ nke Onyenweanyị ebighị ebi ebighị ebi.
Azịza: Aga m ebi n’ụlọ Onyenweanyị, ụbọchị ndụ m niile.
IHE ỌGỤGỤ NKE ABỤỌ – 4:12-14, 19-20
Ihe Ọgụgụ e wetara n’Akwụkwọ Ozi Pọl dị asọ degaara Ndị Filipịa
Isi Okwu: O nweghị ihe ọ bụla m na-agaghị emeri site n’enyemaka Onye ahụ na-agba m ume.
Amụtala m otu e si adị ndụ mgbe a nọ n’ụkọ, na otu e si ebi ndụ mgbe a nọ n’ụba. Agafeela m ihe ndị a, ha bịakwa doo m anya. N’ihi ya, ebe ọ bụla na n’oge ọ bụla, anọ m n’afọ ojuju: ma anọ m na nriju afọ, ma anọ m n’ebumọnụ; ma anọ m n’uju, ma anọ m n’ụkọ.
N’ime Onye ahụ na-enye m ike, enwere m ike ime ihe ọ bụla. Ma ụnụ mere nke ọma n’aka ụnụ nyeere m mgbe m nọ na mkpa. Chineke m ga-akwụ ụnụ ụgwọ, bịakwa gbooro ụnụ mkpa ụnụ n’uju, site n’ụdị akụ na ụba ahụ, O gosịrị anyị na Kristi Jesu. Ka otito dịrị Chineke Nna anyị, ebighị ebi, ebighị ebi. Amen.
MBEKU – Jọn 10: 27
Aleluya, aleluya!
Onyenweanyị kwuru sị: “Atụrụ M na-anụ olu M. Ama M ha; ha na-esokwa M”.
Aleluya!
OZIỌMA – 22:1-14 maọbụ 22:1-10
Ihe Ọgụgụ nke a si n’Oziọma dị asọ nke Matiu dere
Isi Okwu: Kpọbanụ onye ọ bụla n’oriri agbamakwụkwọ.
Jesu gwara ndị isi nchụaja na ndị okenye mmadụ okwu n’ilu ọzọ sị: “Alaeze eluigwe dị ka otu onye eze, nke kpọrọ oriri ọlụlụ nwunye maka nwa ya nwoke.
O zipụrụ ụmụ odibo ya, ka ha kpọọ ndị a kpọrọ oku maka oriri ọlụlụ nwunye, ma ndị a kpọrọ oku jụrụ ịbịa. Ọ bịakwara zipụ ụmụ odibo ya ndị ọzọ sị ha: Gwanụ ndị a kpọrọ oku: ‘Lee! E dozichaala m ihe oriri.
Egbuola m ehi na ewu gbara abụba maka oriri. Ihe niile ezuola! Bịawanụ oriri ọlụlụ nwunye”! Ma ndị a kpọrọ oku lefuuru ya anya, gawara nke ha: Otu jere n’ubi ya.
Nke ọzọ jee n’ụlọ ahịa ya. Ndị ọzọ nwudere ụmụ odibo eze, mesie ha ike, wee gbuo ha. Ihe a wutere eze nke ukwuu. O wee zipụ ndị agha ya, ka ha kwụgbuo ndị ogbu ọchụ ahụ, kpọọ obodo ha ọkụ.
Eze bịakwara gwa ụmụ odibo ya sị: “Akwadochaala m oriri ọlụlụ nwunye nwa m, ma ndị a kpọrọ ka ha rie ya egosila na ha etorughị ogo iri ya. N’ihi ya, gaanụ n’akụkụ okporo ụzọ niile.
Kpọtanụ onye ọ bụla ụnụ hụrụ, ka ọ bịa oriri ọlụlụ nwunye a.” Ụmụ odibo gara n’okporo ụzọ, kpọkọta ndị niile ha hụrụ, ma ndị ọma ma ndị ọjọọ. Ụlọ oriri ahụ jupụtakwara na ndị a kpọrọ.
“Ma mgbe eze batara ịhụ ndị bịara oriri, ọ hụrụ otu nwoke nọ ebe ahụ n’eyighị uwe oriri ọlụlụ nwunye. Eze jụrụ ya: ‘Enyi m, olee otu i si bata ebe a n’eyighị uwe ọlụlụ di na nwunye?”
Ma nwoke ahụ gbachiri ya nkịtị. Eze gwara ndị na-ejere ya ozi, sị: ‘Kee nụ ya ụkwụ na aka, tụpụ ya na mbara ezi, n’ime ọchịchịrị; ebe ahụ ka ịkwa akwa na ịta ikikere eze ga-adị.’ N’ihi na ọ bụ ezie na a kpọrọ ọtụtụ mmadụ, ma ọ bụ mmadụ ole na ole ka a họtara.”
Igbo Mass Readings for October 11 2026, Ụka nke Iri Abụọ na Asatọ n’Oge Na-Adanyeghị N’Emume – Afọ nke Mbụ.