Igbo Mass Readings for September 27 2026, Ụka nke Iri Abụọ na Isii n’Oge Na-Adanyeghị N’Emume – Afọ nke Mbụ.
Nke a bụ Igbo Mass Readings for September 27 2026, Ụka nke Iri Abụọ na Isii n’Oge Na-Adanyeghị N’Emume – Afọ nke Mbụ.
IHE ỌGỤGỤ NKE MBỤ – 18:25-28
Ihe Ọgụgụ nke e wetara n’Akwụkwọ Onye Amụma Izikel
Isi Okwu: Ọ bụrụ na onye njọ ewepụ aka na njọ, n’ezie ọ ga-ebi.
Οkwu Onyenweanyị ruru m ntị sị m: “Ụnụ na-ekwu, Ụzọ Onyenweanyị ezighị ezi.” Ụlọ Izrel, biko geenụ ntị: Ọ bụ ụzọ M bụ nke na-ezighị ezi? Ọ bụ na ọ bụghị ụzọ ụnụ bụ nke na-ezighị ezi?
Mgbe onye ezi omume siri n’ezi omume chigharịa, malite ime mmehie, ọnwụ gbuo ya, ọ bụ n’ihi ajọ omume o metara ka o jiri nwụọ. Ma onye ajọ omume si n’ajọ omume chigharịa, malite ime ezi omume, ọ ga-echedo ndụ ya. N’ihi na ọ tụleela n’obi ya, kpebiekwa ịhapụ mmehie ya niile, ma malite ibi ndụ ziri ezi. Ndụ ga-abụ nke ya. Ọ gaghị anwụ.
ABỤỌMA NA AZỊZA YA – 24:4-9 Az. 6
Azịza: Onyenweanyị, chetanụ ebere Gị.
1. Onyenweanyị, mee ka m mata ụzọ Gị.
Kuziere m okporo ụzọ Gị.
Duziwe m n’ezi okwu Gị, na- agbazikwara m.
Azịza: Onyenweanyị, chetanụ ebere Gị.
2. Onyenweanyị, cheta na obi ebere na obi ọma Gị na-na-adị sitere na mgbe ochie.
E chetakwala njọ m mere na okorobịa n’adịghị ike m.
Onyenweanyị cheta m n’obi ọma Gị, n’ihi na Ị dị mma.
Azịza: Onyenweanyị, chetanụ ebere Gị.
3. Onyenweanyị dị mma bụrụkwa onye ezi omume.
Otu a ka O si egosi ndị njọ ụzọ.
Ọ na-eduba onye umeala n’ezi omume,
bịakwa na-akuziri ndị umeala ụzọ Ya.
Azịza: Onyenweanyị, chetanụ ebere Gị.
IHE ỌGỤGỤ NKE ABỤỌ – 2:1-11 maọbụ 2:1-5
Ihe Ọgụgụ e wetara n’Akwụkwọ Ozi Pọl dị asọ degaara Ndị Filipịa.
Isi Okwu: Echiche ụnụ ga-adị ka nke Kristi
A sị ụnụ ji ndụ anyị dị n’ime Kristi kpọrọ ihe! A sị ịhụnanya nwere ike ịkpalite ụnụ ka ụnụ mee ihe ọ bụla, ma ọ bụ Mmụọ Nsọ ahụ anyị nwekọtara ọnụ!
A sị ọ bụ inwe obi ebere ma ọ bụ obi ọma ka ụnụ jiri kpọrọ ihe, jikọtanụ ọnụ n’inwe otu obi na inwe ịhụnanya. Werenụ otu uche gbawa mbọ inweta otu ihe ahụ anyị na-achọ.
Ihe a bụ sọ otu ihe ga-eme ka m jupụta n’añụrị. Onye emekwala ka e too naanị ya. Onye aghọkwala aghụghọ. Kama onye ọ bụla ga na-achọ ihe ga-abara ibe ya uru.
Were ya, na nke onye nke ọzọ, ka nke gị mkpa; ka a ghara inwe onye bu ụzọ na-achọ nke onwe ya, nke onwe ya. Kama ka onye ọ bụla chewe maka ọdịmma ndị ọzọ.
Uche ụnụ kwesịrị ịdị ka nke Kristi Jesu: [Onye dị ezie n’ụdị Chineke. Ma O kwedosịghị aka ike n’ịha n’otu nke Ya na Chineke. Kama, O mere onwe Ya ka onye na-abụghị ihe ọ bụla; O werela ọnọdụ ohu.
Ọ bịa dị ka mmadụ. Ọ bụghị sọ na Ọ bịara dị ka mmadụ, kama O wedatara onwe Ya n’ala, wee rubegide isi ruo n’ọnwụ – bụ ọnwụ nke obe. Ma Chineke buliri Ya oke elu, bịakwa nye Ya aha kacha aha niile; ka o wee bụrụ na a kpọọ aha Jesu, ihe niile ga-egbu ikpere n’ala – ma ihe niile dị n’eluigwe, ma ihe niile dị n’elu ụwa, ma ihe niile dị n’okpuru ụwa.
A kpọọ aha Jesu, ire niile ga-ekwupụtakwa na Jesu Kristi bụ Onyenweanyị, maka otito na ebube nke Chineke Nna.
MBEKU – Jọn 6, 63.68
Aleluya, aleluya!
Onyenweanyị, okwu Gị bụ mmụọ na ndụ. Ọ bụ Gị ji ozi nke ndụ ebighị ebi.
Aleluya.
OZIỌMA – 21:28-32
Ihe Ọgụgụ nke a si n’Oziọma dị asọ nke Matiu dere
Isi Okwu: Ndị ọnakọ-ụtụ na ụmụnwanyị akwụna ga-ebu ụnụ ụzọ abanye n’alaeze Chineke.
Jesu jụrụ ndị isi nchụaja na ndị okenye sị: “Gịnị ka ụnụ chere? Otu nwoke nwere ụmụ abụọ. O jekwuuru nke diọkpara sị ya: ‘Nwa m, jee ọrụ n’ubi m taa.
Ma ọ zara sị: ‘Agaghị m eje.’ Ma o mesịrị chegharịa, jee ọrụ n’ubi nna ya. Nwoke ahụ jekwukwara nwa ya nke abụọ, ziekwa ya otu ozi ahụ. Nwa ya zara ya: ‘Nna m, aga m ejerịrị ya.
Ma o jeghị. N’ime ụmụ abụọ ndị a, olee nke mere ihe nna ya chọrọ”? Ha zara sị: “Ọ bụ nke mbụ.” Jesu wee sị ha: “N’ịgwa ụnụ eziokwu, ndị ọnakọ-ụtụ na ụmụnwanyị akwụna ga-ebu ụnụ ụzọ abanye n’Alaeze Chineke.
N’ihi na mgbe Jọn Ome Mmirichukwu jiri ịkwụba aka ọtọ bịakwute ụnụ, ụnụ ekweghị n’ihe o kwuru. Ma ndị ọnakọ-ụtụ na ụmụnwanyị akwụna kweere na ya. Ọ bụna mgbe ụnụ hụrụ nke a, ụnụ emesịghị chegharịa, kwere na ya.”
Igbo Mass Readings for September 27 2026, Ụka nke Iri Abụọ na Isii n’Oge Na-Adanyeghị N’Emume – Afọ nke Mbụ.