Igbo Mass Readings for Ụka nke Itoolu n’Oge Na-Adanyeghị N’Emume – Afọ nke Atọ.

Nke a bụ Igbo Mass Readings for Ụka nke Itoolu n’Oge Na-Adanyeghị N’Emume – Afọ nke Atọ.

IHE ỌGỤGỤ NKE MBỤ – 8:41-43

Ihe Ọgụgụ e wetara n’Akwụkwọ Mbụ nke ndị Eze

Isi Okwu: Ọ bụrụ na onye ọbịa abịa, biko nye ya ihe niile ọ rịọrọ.

Solomọn kwụụrụ n’ihu ebe nchụaja nke Dinwenụ bịa setịa aka ya n’eluigwe sị: “Onye mba ahụ na-abụghị otu onye n’ime ndị nke Gị bụ Izrel; ọ bụrụ na onye a sitere na mba tere aka, jiri maka ihi aha Gị bịa kpee ekpere n’ụlọ nsọ nke a; biko site n’ebe obibi Gị dị n’eluigwe bịa nụrụ olu ya.

Meere ya bụ onye ọbịa, ihe ọ na-arịọ. N’ihi na ndị mmadụ ga-anụ aha Gị, nụ maka aka Gị dị ike nke Ị gbasara agbasa. Otu a, mmadụ niile nọ n’ụwa ga-anụ aha Gị, bịakwa soro nzọ-ụkwụ ndị nke Gị Izrel, bịa sọpụrụ Gị. Ha ga-amatakwa na aha Gị ka e nyere ụlọ nsọ ahụ nke m wuru.

ABỤỌMA NA AZỊZA YA – 116:1-2 Az. Mk. 16:15

Azịza: Gawanụ na mba niile, gaanụ kwupụta Oziọma. ma ọ bụ Aleluya

1. Mba niile, toonụ Dinwenụ,

mmadụ niile, jikọọnụ ọnụ too Ya.

Azịza: Gawanụ na mba niile, gaanụ kwupụta Oziọma. ma ọ bụ Aleluya

2. Ịhụnanya Ya ebuka n’ebe anyị nọ.

Eziokwu nke Dinwenụ dị ebighị ebi.

Azịza: Gawanụ na mba niile, gaanụ kwupụta Oziọma. ma ọ bụ Aleluya

IHE ỌGỤGỤ NKE ABỤỌ – 1:1-2, 6-10

Ihe Ọgụgụ e wetara n’Akwụkwọ Ozi Pọl dị asọ degaara ndị Galeshia

Isi Okwu: Ọ bụrụ na m na-achọ otito n’aka ndị mmadụ, etosịghị m ịbụ nwodibo Kristi.

Pọl, onye a kpọrọ ịbụ onye ozi; ọ bụghị site na nhọpụta nke ndị mmadụ, ma ọ bụ nke mmadụ ọ bụla, kama site na nhọpụta nke Jesu Kristi, na nke Chineke Nna Ya, Onye ahụ mere ka O si n’ọnwụ bilie.

Ụmụnna anyị niile ndị mụ na ha nọ ebe a, so m na-ezitere Nzukọ Galeshia niile ozi ekele. Ọ gbara m gharịị na ụnụ ji ọsọ ọsọ otu a na-agbanarị onye ahụ kpọrọ ụnụ site n’usoro amara Kristi, wee na-agbaso ozi ọma ọzọ dị iche.

N’ịgwa ụnụ ezi okwu, “Ozi Ọma ọzọ” adịghị. Ana m ekwu nke a n’ihi na ụfọdụ mmadụ na-atụgharị obi ụnụ, na-achọkwa ịgbanwo Oziọma nke Kristi. Ma a sịgodu na anyị onwe anyị, ma ọ bụ mmụọma si n’eluigwe bịara, zie ụnụ Oziọma ọzọ, nke na-abụghị Oziọma ahụ anyị kụzirila ụnụ na mbụ, ya bụrụkwa onye a bụrụ ọnụ!

Anyị ekwuola ya na mbụ. Ugbu a, ekwukwa ya ọzọ: Ọ bụrụ na onye ọ bụla ezie ụnụ Oziọma ọzọ, nke na-abụghị Oziọma ahụ ụnụ natara na mbụ, ya bụrụkwa onye a bụrụ ọnụ!

Ihe m na-achọ ugbu a, ọ bụ ka mmadụ too m? Ka ọ bụ ka Chineke too m? Ọ bụ otu a ka e si enweta otito mmadụ? Ọ bụrụ na mbọ niile a m na-agba bụ ka m nweta otito mmadụ, ọ pụtara na m abụghị nwodibo Kristi.

MBEKU

Aleluya, aleluya:

Chineke hụrụ ụwa n’anya nke ukwuu, nke na O nyere Sọ Otu Nwa Ya; ka onye ọ bụla kwere na Ya, wee nweta ndụ ebighị ebi.

Aleluya

OZIỌMA – 7:1-10

Ihe Ọgụgụ nke a si n’Oziọma dị nsọ nke Luk dere.

Isi okwu: Ahụbeghị m okwukwe dị otu a, ọ bụladị n’ala Izrel.

Mgbe Jesu gwachara ndị mmadụ okwu, O wee banye na Kapanọm. Otu onye ọchị agha, na-achị ọgụ ndị agha ise, nwere otu odibo dị ya n’obi; odibo ahụ dị ya n’obi dara nnukwu ọrịa, nke mere ka ọnọdụ n’ọnụ ọnwụ.

Mgbe ọchị agha ahụ nụrụ maka Jesu, o ziri ndị okenye nke ndị Juu ka ha jee rịọ Jesu, ka Ọ bịa gwọọ odibo ya. Mgbe ndị okenye ndị Juu bịakwutere Jesu, ha jiri obi ha niile rịọwa Ya, sị: “Ọchị agha nke a bụ onye I kwesịrị imere amara dị otu a, n’ihi na ọ hụrụ ndị ala anyị n’anya; o wukwaara anyị otu ụlọ nzukọ.”

Jesu wee soro ha gaa. Ma mgbe ọ fọdụrụ nwantakịrị ka ha bịaruo n’ebe ọchị agha ahụ bi, ọchị agha ahụ zipụrụ ndị enyi ya ka ha zute Jesu gwa Ya sị: “Nna anyị ukwu, e sogbula onwe Gị.

N’ihi na ekwesịghị m ka Ị bata n’ụlọ m. Ọ bụ nke a kpatara na ejighị m ụkwụ m bịa, kpọọ gị n’onwe m. Kama kwuo naanị okwu ọnụ, nwodibo m ga-adịhị.

N’ihi na mụ onwe m bụkwa onye ghọtara ike dị n’okwu ọnụ onye nọ n’ọchịchị. Enwere m ndị agha nọ n’okpuru m; nke m sị “gawa”, ya gawa. Nke m sị “bịa”, ya bịa. M sị ohu m: “Mee ihe a”, ya mee ya.”

Mgbe Jesu nụrụ ihe a, ọ tụrụ Ya n’anya. O wee tụgharịa gwa igwe mmadụ ahụ so Ya okwu sị: “N’ezie agwa M ụnụ, ahụbeghị M ụdị okwukwe dị otu a n’etiti ụmụ Izrel!” Mgbe ndị ahụ ọchị agha ahụ zitere laghachiri n’ụlọ ya, ha hụrụ na ahụ adịla odibo ahụ mma.

Igbo Mass Readings for Ụka nke Itoolu n’Oge Na-Adanyeghị N’Emume – Afọ nke Atọ.