Igbo Mass Readings for April 9 2025, Wenezde Izuụka nke Ise n’Oge Lent

Igbo Mass Readings for April 9 2025, Wenezde Izuụka nke Ise n’Oge Ncheta Ahụhụ Kristi

Nke a bụ Igbo Mass Readings maka April 9 2025, Wenezde Izuụka nke Ise n’Oge Ncheta Ahụhụ Kristi.

IHE ỌGỤGỤ NKE MBỤ – 3:14-20, 91-92, 95

Ihe Ọgụgụ e wetara n’Akwụkwọ onye Amụma Daniel

Eze Nebukadneza wee jụọ ha sị, “Shadrak, Mishak, na Abedinego, ọ bụ eziokwu na ụnụ anaghị efe chi ndị nke m na-efe, nakwa na ụnụ jụrụ isekpuru ihe ahụ ejiri ọlaedo kpụọ nke mụ onwe m kwụwara?

Mgbe ụnụ nụrụ ụda opi, ọja, une, ụbọakwara, ma ọ bụ ihe egwu ndịọzọ, ụnụ dị nkwadebe ịkpọ isiala sekpuoro mmadụ a m kpụrụ? Ọ bụrụ na ụnụ ajụ isekpuru ya, aga-atụba ụnụ n’atụfughị oge n’ime ọkụ na-enwu enwu, olee chi ga-azọpụta ụnụ n’aka m?”

Shadrak, Mishak na Abedinego wee zaghachị eze Nebukadneza sị, “Ajụjụ ị jụrụ anyị etosịghị ọsịsa. Ọ bụrụ na Chineke anyị, onye nke anyị na-efe nwere ike ịzọpụta anyị n’ọkụ na-enwu enwu, na n’aka gị, ọ ga-azọpụta anyị.

Ọ bụrụgodu na ọ zọpụtaghị anyị, mata nke ọma, o eze, na anyị agaghị efe chi nke i na-efe ma ọ bụkwanụ sekpuoro ihe a kpụrụ akpụ nke ị kwụbara.”

Okwu ndị a wutere eze Nebukadneza nke ukwuu, ihu ya wee gbarụọ ka ọ na-ele Shadrak, Mishak na Abedinego, o nyere iwu ka e mee ka ụlọ ọkụ ahụ dị ọkụ mmaji asaa karịa ka ọ na-adị na mbụ.

O nyekwara ụfọdụ ndị agha ya iwu ka ha kee Shadrak, Mishak na Abedinego agbụ tụbaa ha n’ime ụlọ ọkụ na-enwu enwu. Mgbe ahụ eze Nebukadneza maliri n’oche ya, ihe ọ hụrụ tụrụ ya n’anya nke ukwuu.

Ọ bịa jụọ ndị ndụmọdụ ya sị, “Ọ bụ na anyị ekeghị ụmụokorobịa atọ agbụ ma tụbakwa ha n’ime ọkụ?” Ha zaghachiri ya sị, “Ee, Onyeeze!” Nebukadneza kwukwara, “Mana, ana m ahụ ụmụokorobịa anọ ka ha na-agagharị n’ime ọkụ, o nweghịkwa ihe ọbụla ọkụ na-eme ha.

Nwaokorobịa nke anọ dịkwa ka nwa Chineke”. Nebukadneza wee tie mkpu sị, “Ngọzi dịrị Chineke nke Shadrak, Mishak na Abedinego, O zitela mmụọozi ya ka ọ bịa zọpụta ụmụodibo ya, ndị tụkwasara nchekwube ha na ya, wee nupụrụ onyeeze isi. Ha họọrọ ịnwụ ọnwụ karịa ife chi ọbụla abụghị chi nke ha.

ABỤỌMA NA AZỊZA – Dan. 3:52,53, 54, 55, 56.

Azịza: Otito na nsọpụrụ dịrị gị ebeebe.

1. “Ngọzi dịrị gị, Yahweh, Chineke nke nnanna anyị ha,

Otito na nsọpụrụ dịrị gị ebeebe,

Ngọzi dịrị aha gị dị nsọ,

otito na nsọpụrụ dịrị gị ebeebe.

Azịza: Otito na nsọpụrụ dịrị gị ebeebe.

2. Ngọzi dịrị gị n’ụlọnsọ gị dị ebube,

Ngọzi kacha elu dịrị gị ebeebe.

Azịza: Otito na nsọpụrụ dịrị gị ebeebe.

3. Ngọzi dịrị gị n’oche eze gị;

Otito kacha elu dịrị gị ebeebe.

Azịza: Otito na nsọpụrụ dịrị gị ebeebe.

4. Ngọzi dịrị gị onye mazuru ihe niile,

nọrọkwa n’oche nke Kerub,

ka enye gị otito na ngọzi kacha elu ebeebe.

Azịza: Otito na nsọpụrụ dịrị gị ebeebe.

5. Ngọzi dịrị gị n’eluigwe,

Ị dị ngọzi dịkwa elu karịcha ihe niile ebeebe.

Azịza: Otito na nsọpụrụ dịrị gị ebeebe.

MBEKU – Ezikel 18:31.

R/ Otito na ebube dịrị Gị, O Dinwenụ, Jesu Kristi.

Tụfuonụ mmehie ụnụ niile nke ụnụ mere megide m; nwetaranụ onwe ụnụ obi ọhụrụ na mmụọ ọhụrụ.

R/ Otito na ebube dịrị Gị, O Dinwenụ, Jesu Kristi.

OZIỌMA – 8:31-42.

Ihe Ọgụgụ e wetara n’Oziọma dị asọ nke Jọn dere.

Jesu sịrị ndị Juu ndị kwere na ya, “Ọ bụrụ na ụnụ anọgide n’okwu m, ụnụ bụ ndị na-eso ụzọ m n’eziokwu. Ụnụ ga-amatakwa eziokwu, eziokwu ahụ ga-eme ka ụnụ nwere onwe ụnụ.”

Ha zara ya sị, “Anyị bụ ụmụ Abraham, anyị abụbeghị ohu onye ọbụla. Olee otu I si ekwu sị, ‘Ụnụ ga- enwere onwe ụnụ?” Jesu zara ha sị, “N’eziokwu agwa m ụnụ onye ọbụla na-eme mmehie bụ ohu nke mmehie.

Ohu anaghị anọgide n’ụlọ onye nwe ya ruo mgbe ebighịebi, ma nwa na anọgide ebighịebi. Ya bụ, ọ bụrụ na Nwa ahụ emee ka ụnụ nwere onwe ụnụ, ụnụ ga-enwere onwe ụnụ n’eziokwu.

Ama m na ụnụ bụ ụmụ Abraham ma ụnụ na-achọ igbu m, n’ihina okwu m enweghị ọnọdụ n’ime ụnụ. Ana m ekwu ihe m hụrụ n’ebe Nna m nọ, ma ụnụ onwe ụnụ na-eme ihe nna ụnụ gwara ụnụ.”

Ha zara ya sị, Abraham bụ nna anyị.” Jesu wee sị ha, “Ọ bụrụ na ụnụ bụ ụmụ Abraham, ụnụ ga-eme ihe Abraham mere. Ugbu a ụnụ na-achọ igbu m, bụ onye gwara ụnụ eziokwu nke m nụrụ site na Chineke. Ihe a abụghị ihe Abraham mere.

Ụnụ na-arụ ọrụ nna ụnụ rụrụ.” Ha gwara ya sị, “Amụghị anyị site na-ịkwa iko. Anyị nwere otu Nna, bụ Chineke.” Jesu gwara ha sị, “Ọ bụrụ na Chineke bụ Nna ụnụ, ụnụ ga-ahụ m n’anya, n’ihina esi m na Chineke bịa. Abịaghị m n’onwe m kama ọ bụ ya zitere m.

Igbo Mass readings for April 10 2025, Tọọzde n’ime Izuụka nke Ise n’Oge Ncheta Ahụhụ Kristi.

Igbo Mass Readings for April 9 2025, Wenezde Izuụka nke Ise n’Oge Ncheta Ahụhụ Kristi.